Мөселман модасы

Мөселман ательесына таләпләрең нинди?
"Төрекчә киенеп йөри" дип әйтүчеләргә ничек карыйсың?
Киемнәреңне кайда тектерәсең?

Ләйсән Мифтахова, Казан дәүләт мәдәният һәм сәнгать университеты укытучысы:
— Минемчә, дини яктан киемнең бөтен нечкәлекләрен дә тоярлык, шул ук вакытта шәригатькә ярашлы яңа модельләр дә тәкъдим итәрлек белгеч булсын.
— "Төрекчә киенәләр" дип әйтүгә килгәндә, мин кешенең ничек киенүенә игътибар итмим. Аның күз карашы гына гайрәт чигерерлек булмасын. Монысы — бер. Икенчедән, кайда эшләвемә карамастан, мин үзем дә еш кына шулай киенеп йөрим. Канәгатьсезлек белдерүчеләр очрый.
Иң мөһиме, кием шәригатьчә һәм үзеңне уңайлы хис итәрлек булсын...
— Киемнәремне Мәрҗани урамы, 26 нчы йортта урнашкан ательеда тектерәм.

Фирүзә Әминева, Казан дәүләт педагогика университетының татар теле һәм әдәбияты, инглиз теле факультеты студенты:
— Биредә, әлбәттә, мөселман тегүчеләре эшләргә тиештер. Бу очракта ул ислам кануннарын аңлап эш итәчәк.
— Күп кенә кешеләргә хәзерге яшьләрнең "төрекчә" киенүе, яулыкны маңгайга төшереп бәйләве ошамый. Алар "әбиләребез болай киенмәгән, татар мөселман хатын-кызларының киеме милли гореф-гадәтләргә туры килергә тиеш" дип саныйлар. Хатын-кыз киемендә, иң беренче чиратта, дини кануннар, аннан соң гына милли традицияләр өстенлек алырга тиештер...
Тагын бер фикерем: киеме генә түгел, әхлагы да, үз-үзен тотышы да киеменә килешле булсын. —Киемнәремне күбесенчә өйдә тегүче мөселман хатын-кыз тегүчеләргә тектерәм.

“Әл-Кыйбла” журналы №2/2004 ел.